دئے اس نے اوروں کو ساغر پہ ساغر

دئے اس نے اوروں کو ساغر پہ ساغر

چبھوئے مرے دل میں نشتر پہ نشتر

مریض محبت کی ہے اب یہ حالت

کہ آتے ہیں ہر وقت چکر پہ چکر

مری سخت جانی غضب رنگ لائی

ہوئے کند قاتل کے خنجر پہ خنجر

کرم ہے یہ ساقی کی دریا دلی کا

ملے مجھ کو بھر بھر کے ساغر پہ ساغر

چڑھاتے ہیں تیوری دکھاتے ہیں آنکھیں

چبھوتے ہیں دل میں وہ نشتر پہ نشتر

تری جستجو میں مہ و مہر دونوں

لگاتے ہیں دن رات چکر پہ چکر

مقابل ہوا ان کی چتون سے جب دل

پڑے تیر پر تیر خنجر پہ خنجر

نگاہوں نے دل میں چبھوئی ہیں چھریاں

اداؤں نے مارے ہیں خنجر پہ خنجر

نہ سرکا سر اس در سے آفاقؔ ہرگز

لگا کر اسے لاکھ ٹھوکر پہ ٹھوکر

diye us ne auron ko saghar pe saghar

chubhoe mire dil mein nashtar pe nashtar

mariz-e-mohabbat ki hai ab ye halat

ke ate hain har waqt chakkar pe chakkar

miri sakht jani ghazab rang lai

hue kand qatil ke khanjar pe khanjar

karam hai ye saqi ki dariya dili ka

mile mujh ko bhar bhar ke saghar pe saghar

charhate hain tewri dikhate hain ankhen

chubhote hain dil mein wo nashtar pe nashtar

tiri justuju mein mah-o-mehr donon

lagate hain din rat chakkar pe chakkar

muqabil hua un ki chitwan se jab dil

pare tir par tir khanjar pe khanjar

nigahon ne dil mein chubhoi hain chhuriyan

adaon ne mare hain khanjar pe khanjar

na sarka sar us dar se afaq hargiz

laga kar use lakh thokar pe thokar