دکھا کر مجھ کو چشم مست مستانہ بنا ڈالا

دکھا کر مجھ کو چشم مست مستانہ بنا ڈالا

پلا کر آج ساقی تو نے دیوانہ بنا ڈالا

قیام یاد خوباں کو ترقی دے خدا اس نے

مرے اجڑے ہوئے دل کو پری خانہ بنا ڈالا

دل صد چاک میرا تھا بھلا کس کام کے قابل

مگر اک شوخ نے لے کر اسے شانا بنا ڈالا

ضرر پہنچا نہ مے خانے کو کچھ سنگ حوادث سے

اگر ٹوٹی کوئی بوتل تو پیمانہ بنا ڈالا

غضب جادو بھری ہوتی ہیں آنکھیں حسن والوں کی

نظر جس سے ملائی اس کو دیوانہ بنا ڈالا

تمنا وصل کی دل سے جو نکلی یہ خیال آیا

کہ اک آباد گھر کو ہائے ویرانہ بنا ڈالا

وہ میکش ہوں کہ ہر دم شیشہ و ساغر ہے ساتھ اپنے

جہاں بیٹھا وہیں پر ایک مے خانہ بنا ڈالا

خیال بادہ نوشی فرقت ساقی میں جب آیا

بنایا دل کو خم آنکھوں کو پیمانہ بنا ڈالا

خدا کے فضل سے آفاقؔ تھا فرزانہ و عاقل

نوازش کی بتوں نے اس کو دیوانہ بنا ڈالا

dikha kar mujh ko chashm-e-mast-e-mastana bana dala

pila kar aj saqi tu ne diwana bana dala

qayam-e-yad-e-khuban ko taraqqi de khuda us ne

mire ujre hue dil ko pari khana bana dala

dil-e-sad chak mera tha bhala kis kam ke qabil

magar ik shokh ne le kar use shana bana dala

zarar pahuncha na mai khane ko kuchh sang-e-hawadis se

agar tuti koi botal to paimana bana dala

ghazab jadu bhari hoti hain ankhen husn walon ki

nazar jis se milai us ko diwana bana dala

tamanna wasl ki dil se jo nikli ye khayal aya

ke ik abad ghar ko hae wirana bana dala

wo maikash hun ke har dam shisha-o-saghar hai sath apne

jahan baitha wahin par ek mai khana bana dala

khayal-e-bada noshi furqat saqi mein jab aya

banaya dil ko kham ankhon ko paimana bana dala

khuda ke fazl se afaq tha farzana-o-aqil

nawazish ki buton ne us ko diwana bana dala