درد پر پیار آیا چوٹ بھی اچھی لگی

درد پر پیار آیا چوٹ بھی اچھی لگی

آج پہلی بار مجھ کو زندگی اچھی لگی

قہقہہ کس نے لگایا میرے حال زار پر

کس کو زیر دام میری بے بسی اچھی لگی

اشک ایسا جگمگایا دیدۂ نمناک میں

چاند تاروں کو بھی جس کی روشنی اچھی لگی

آج پھولوں کا تبسم دل کو کچھ بھایا نہیں

غنچۂ معصوم کی لب‌ بستگی اچھی لگی

میری شوریدہ مزاجی کو دعائیں دے گئے

عقل والوں کو مری دیوانگی اچھی لگی

درد بخشا غم دیا آنسو عنایت کر دئیے

میرے محسن یہ تری دریا دلی اچھی لگی

ہو گیا برباد رسوائے زمانہ ہو گیا

پھر بھی نادمؔ کو تری فتنہ گری اچھی لگی

dard par pyar aya chot bhi achchhi lagi

aj pahli bar mujh ko zindagi achchhi lagi

qahqaha kis ne lagaya mere hal-e-zar par

kis ko zer-e-dam meri be basi achchhi lagi

ashk aisa jagmagaya dida-e-namnak mein

chand taron ko bhi jis ki raushni achchhi lagi

aj phulon ka tabassum dil ko kuchh bhaya nahin

ghuncha-e-maasum ki lab bastagi achchhi lagi

meri shorida mizaji ko duaen de gae

aql walon ko miri diwangi-e-achchhi lagi

dard bakhsha gham diya ansu inayat kar diye

mere mohsin ye tiri dariya dili achchhi lagi

ho gaya barbad ruswa-e-zamana ho gaya

phir bhi nadim ko tiri fitna giri achchhi lagi