جو تیرے نقش کف پا پہ چل گئے ہوتے

جو تیرے نقش کف پا پہ چل گئے ہوتے

تو مہر و ماہ سے آگے نکل گئے ہوتے

تمہارا نام لبوں پر جو آ گیا ہوتا

تو گرنے والے یقیناً سنبھل گئے ہوتے

ہم اپنے جوش جنوں کو جو ضبط کر جاتے

تو حادثات کے تیور بدل گئے ہوتے

سمجھ سکا نہ کوئی عظمت وفا ورنہ

ہمارے خواب حقیقت میں ڈھل گئے ہوتے

ہماری تشنہ لبی مصلحت سمجھ ورنہ

ہمارے واسطے شیشے پگھل گئے ہوتے

چمن کو خون جگر کون بخشتا نادمؔ

جو ہم بھی جانب صحرا نکل گئے ہوتے

jo tere naqsh-e-kaf pa pe chal gae hote

tu mehr-o-mah se age nikal gae hote

tumhara nam labon par jo a gaya hota

tu girne wale yaqinan sambhal gae hote

ham apne josh-e-junun ko jo zabt kar jate

tu hadsat ke tewar badal gae hote

samajh saka na koi azmat wafa warna

hamare khwab haqiqat mein dhal gae hote

hamari tishna labi maslahat samajh warna

hamare waste shishe pighal gae hote

chaman ko khun-e-jigar kaun bakhshta nadim

jo ham bhi janib-e-sahra nikal gae hote