موجود تھے وہ میرے ہی اندر کھلے ہوئے

موجود تھے وہ میرے ہی اندر کھلے ہوئے

مجھ پر دعا کے بعد کھلے در کھلے ہوئے

آنکھوں نے کر دیا اسے رخصت مگر ابھی

رکھے ہوئے ہیں دل نے سبھی در کھلے ہوئے

کچھ تو کھلے کہ گزری ہے کیا اہل دشت پر

آئے ہیں لوگ شہر میں کیوں سر کھلے ہوئے

اک خوف ہے کہ جس نے اڑائی ہے میری نیند

دیکھے ہیں میں نے خواب میں خنجر کھلے ہوئے

ممکن ہے پھر سروں کو اٹھائیں نہ فخر سے

قبروں کے دیکھ لیں جو کبھی سر کھلے ہوئے

لٹنے میں درد کیا ہے کبھی ان سے پوچھ لیں

چھوڑ آئے تھے جو لوگ یشبؔ گھر کھلے ہوئے

maujud the wo mere hi andar khule hue

mujh par dua ke baad khule dar khule hue

ankhon ne kar diya use rukhsat magar abhi

rakhe hue hain dil ne sabhi dar khule hue

kuchh to khule ke guzri hai kya ahl-e-dasht par

ae hain log shahr mein kyun sar khule hue

ik khauf hai ke jis ne urai hai meri nind

dekhe hain main ne khwab mein khanjar khule hue

mumkin hai phir saron ko uthaen na fakhr se

qabron ke dekh len jo kabhi sar khule hue

lutne mein dard kya hai kabhi un se puchh len

chhor ae the jo log yashb ghar khule hue