میں پہلے دل کے لئے حوصلہ بناتا ہوں

میں پہلے دل کے لئے حوصلہ بناتا ہوں

پھر اس کے بعد کوئی آسرا بناتا ہوں

میں بے مراد نظر آ رہا ہوں لوگوں کو

میں دوسروں کے لئے راستہ بناتا ہوں

میں مانتا بھی نہیں کوئی کارساز بھی ہے

مگر زمیں پہ بہت سے خدا بناتا ہوں

اگر حجاب نہ ہوتا تو سب سے کہہ دیتا

میں کیسے ہجر کو لذت فزا بناتا ہوں

زمانے بھر کے اندھیروں سے جنگ ہوتی ہے

میں روشنی کے لئے جب دیا بناتا ہوں

یہ شہر عشق مرے واسطے نیا ہے میاں

اب آیا ہوں تو کوئی سلسلہ بناتا ہوں

main pahle dil ke liye hausla banata hun

phir is ke baad koi asra banata hun

main be murad nazar a raha hun logon ko

main dusron ke liye rasta banata hun

main manta bhi nahin koi karsaz bhi hai

magar zamin pe bahut se khuda banata hun

agar hijab na hota to sab se kah deta

main kaise hijr ko lazzat faza banata hun

zamane bhar ke andheron se jang hoti hai

main raushni ke liye jab diya banata hun

ye shahr-e-ishq mire waste naya hai miyan

ab aya hun to koi silsila banata hun