نعیم آج میں اس شکل کو جواں دیکھا

نعیم آج میں اس شکل کو جواں دیکھا

خدا کو صورت انسان میں عیاں دیکھا

تو ہی ہے کعبہ میں اور تو ہی بت کدے میں ہے

غرض کہ تجھ کو بھی ہم نے کہاں کہاں دیکھا

کرو گے جور کسی اور پر تو جانو گے

ابھی تو ظلم کا تم نے مزا کہاں دیکھا

ہم اپنی دل کی تلاوت کو یاد کر روئے

کسی کے حال پہ گر تجھ کو مہرباں دیکھا

گرے ہم آن کے تب تیرے آستانے پر

جہاں میں کوئی نہ جب تجھ سا قدرداں دیکھا

اگرچہ یار تو تیرے ہزار ہوویں گے

کوئی بھی ہم سا بھلا یار جاں فشاں دیکھا

یقیں نعیمؔ کے احوال کا نہ تھا تجھ کو

گیا نہ جی ہی سے آخر اے بد گماں دیکھا