کبھی چمن سے کبھی انجمن سے گزرے ہیں

کبھی چمن سے کبھی انجمن سے گزرے ہیں

پڑا ہے وقت تو دار و رسن سے گزرے ہیں

وہ کیا ڈریں گے ترے پیچ و خم سے راہ حیات

جو کوئے زلف شکن در شکن سے گزرے ہیں

نثار موسم گل ان کی خندہ روئی پر

جو مسکراتے ہوئے اس چمن سے گزرے ہیں

انہیں کے واسطے زیبا ہے ناز کج کلہی

رہ حیات میں جو بانکپن سے گزرے ہیں

رچی بسی ہے یہاں ان کے پیرہن کی مہک

ابھی ابھی وہ اسی انجمن سے گزرے ہیں

نظر نظر میں جلا کر چراغ دانش و دیں

ہمیں سواد دل اہرمن سے گزرے ہیں

ہمیں لبوں پہ دعاؤں کا قافلہ لے کر

سحاب بارگہہ ذو المنن سے گزرے ہیں

ہمیں چھڑکتے ہوئے جا بجا لہو اپنا

دیار لالہ و سرو و سمن سے گزرے ہیں

kabhi chaman se kabhi anjuman se guzre hain

para hai waqt to dar-o-rasan se guzre hain

wo kya darenge tire pech-o-kham se rah-e-hayat

jo ku-e-zulf-e-shikan dar shikan se guzre hain

nisar mausam-e-gul un ki khanda roi par

jo muskurate hue is chaman se guzre hain

unhen ke waste zeba hai naz-e-kaj kulahi

rah-e-hayat mein jo bankpan se guzre hain

rachi basi hai yahan un ke pairahan ki mahak

abhi abhi wo isi anjuman se guzre hain

nazar nazar mein jala kar charagh-e-danish-o-din

hamen sawad-e-dil ahriman se guzre hain

hamen labon pe duaon ka qafila le kar

sahab bargah zu alamnan se guzre hain

hamen chhirakte hue ja baja lahu apna

dayar-e-lala-o-sarw-o-saman se guzre hain