بوئے گل رنگ حنا ناز نسیم سحری

بوئے گل رنگ حنا ناز نسیم سحری

ترے افسوں کی سب اے دوست ہے افسانہ گری

ایک ہی حال پہ قائم ہے ازل سے اب تک

حسن کی عشوہ گری عشق کی شوریدہ سری

جانے والے تو ستاروں سے پرے جا پہنچے

اہل محفل لئے بیٹھے رہے شیشہ کی پری

اب کوئی فرق نہیں ان میں خذف ہوں کہ گہر

ہائے اے عہد بصیرت یہ تری بے بصری

کتنے مجروح ہیں اس دور میں احساس و شعور

کتنی مظلوم ہے اس عہد میں بالغ نظری

تجھ کو اے دوست وفاؔ یاد رہے یا نہ رہے

ہاں مگر یاد رہے گی مری ویراں نظری

bu-e-gul rang-e-hina naz-e-nasim-e-sahari

tire afsun ki sab ai dost hai afsana giri

ek hi hal pe qaim hai azal se ab tak

husn ki ishwa giri ishq ki shorida siri

jane wale to sitaron se pare ja pahunche

ahl-e-mahfil liye baithe rahe shisha ki pari

ab koi farq nahin un mein khazaf hun ke guhar

hae ai ahd-e-basirat ye tiri be basari

kitne majruh hain is daur mein ehsas-o-shuur

kitni mazlum hai is ahd mein baligh nazari

tujh ko ai dost wafa yad rahe ya na rahe

han magar yad rahegi miri wiran nazari