Arooz is now on the App Store, for iPhone and iPad. Download →

All poetry

ممنون گیسو و لب و رخسار کون ہے

Vafa Malikpuri (1923–2003)

ممنون گیسو و لب و رخسار کون ہے

مجھ سا شہید طالع بیدار کون ہے

محو طواف کوچۂ جاناں سبھی تو ہیں

لیکن یہ دیکھیے کہ سر دار کون ہے

اک شمع ہے سو جلتی ہے اپنی ہی آگ میں

اے سوز عشق تیرا عزادار کون ہے

دنیا ہے قید خانہ سبھی قید ہیں مگر

ان قیدیوں میں تیرا گرفتار کون ہے

گل راہ میں بچھے ہوں تو ساتھی ہزار ہیں

لیکن رفیق وادیٔ پر خار کون ہے

دل میں ہوں ناوک غم دوراں لئے ہوئے

مجھ سا حریص لذت آزار کون ہے

سب پھیرتے ہیں تجھ سے نظر اے زوال حسن

آئینے کے سوا ترا غم خوار کون ہے

اپنی دوکاں بڑھائیے اب حضرت وفاؔ

اس دور میں وفا کا خریدار کون ہے