مجھے سنو کہ حدیث غزل نما ہوں میں

مجھے سنو کہ حدیث غزل نما ہوں میں

مجھے پڑھو ورق مصحف وفا ہوں میں

ملے گی اس میں تمہیں اپنے دل کی دھڑکن بھی

کسی کے قلب شکستہ کی اک صدا ہوں میں

تمام رات جو لڑتا رہا اندھیروں میں

حریم عشق کا وہ آخری دیا ہوں میں

بڑھا ہوا ہے زمانہ میں کاروبار کا قد

کہ اپنے قد سے بھی کچھ اور گھٹ گیا ہوں میں

ہر ایک ملتا ہے مجھ سے اب اجنبی کی طرح

خود اپنے شہر میں بیگانہ بن گیا ہوں میں

اب اپنی شکل بھی پہچان میں نہیں آتی

کبھی جو بھولے سے آئینہ دیکھتا ہوں میں

نہ فلسفی نہ مفکر نہ مجتہد نہ خطیب

وفاؔ یہ کچھ بھی نہیں ہوں مگر وفا ہوں میں

mujhe suno ke hadis-e-ghazal numa hun main

mujhe parho waraq mushaf-e-wafa hun main

milegi is mein tumhen apne dil ki dharkan bhi

kisi ke qalb-e-shikasta ki ik sada hun main

tamam rat jo larta raha andheron mein

harim-e-ishq ka wo akhiri diya hun main

barha hua hai zamana mein karobar ka qad

ke apne qad se bhi kuchh aur ghut gaya hun main

har ek milta hai mujh se ab ajnabi ki tarah

khud apne shahr mein begana ban gaya hun main

ab apni shakl bhi pahchan mein nahin ati

kabhi jo bhule se aina dekhta hun main

na falsafi na mufakkir na mujtahid na khatib

wafa ye kuchh bhi nahin hun magar wafa hun main