بتوں کا ساتھ دیا بت شکن کا ساتھ دیا

بتوں کا ساتھ دیا بت شکن کا ساتھ دیا

فریب عشق نے ہر حسن ظن کا ساتھ دیا

مرے سکوت نے کب انجمن کا ساتھ دیا

تمہاری چشم سخن در سخن کا ساتھ دیا

تمہارے گیسوئے پر خم پہ مرنے والوں نے

جب آیا وقت تو دار و رسن کا ساتھ دیا

بہار آئی تو محروم‌ رنگ و بو ہیں وہی

جنوں نے دور خزاں میں چمن کا ساتھ دیا

بجھے جو پچھلے پہر تیری انجمن کے چراغ

تو داغ دل نے مرے انجمن کا ساتھ دیا

چمن میں ایک ہمیں رہ گئے خزاں کے لئے

کہ بلبلوں نے بھی رنگ چمن کا ساتھ دیا

خدا کی شان کہ ننگ وطن وہ کہلائیں

جنہوں نے مر کے بھی خاک وطن کا ساتھ دیا

خدا کا شکر کہ میت تو ڈھک گئی اپنی

غبار راہ نے اک بے کفن کا ساتھ دیا

کبھی جو بزم میں اس بت کی بات آ نکلی

جناب شیخ نے بھی برہمن کا ساتھ دیا

وہ طرز نو ہو کہ طرز کہن وفاؔ ہم نے

ہر ایک طرح مذاق سخن کا ساتھ دیا

buton ka sath diya but shikan ka sath diya

fareb-e-ishq ne har husn-e-zan ka sath diya

mire sukut ne kab anjuman ka sath diya

tumhari chashm-e-sukhan dar sukhan ka sath diya

tumhare gesue par kham pe marne walon ne

jab aya waqt to dar-o-rasan ka sath diya

bahar ai to mahrum rang-o-bu hain wahi

junun ne daur-e-khizan mein chaman ka sath diya

bujhe jo pichhle pahar teri anjuman ke charagh

tu dagh-e-dil ne mire anjuman ka sath diya

chaman mein ek hamen rah gae khizan ke liye

ke bulbulon ne bhi rang-e-chaman ka sath diya

khuda ki shan ke nang-e-watan wo kahlaen

jinhon ne mar ke bhi khak-e-watan ka sath diya

khuda ka shukr ke mayyat to dhak gai apni

ghubar-e-rah ne ik be kafan ka sath diya

kabhi jo bazm mein us but ki bat a nikli

janab-e-shaikh ne bhi barahman ka sath diya

wo tarz-e-nau ho ke tarz-e-kuhan wafa ham ne

har ek tarah mazaq-e-sukhan ka sath diya