شریک حال جب ناکامیٔ تدبیر ہوتی ہے

شریک حال جب ناکامیٔ تدبیر ہوتی ہے

تو پھر وحشت اثر ہر خواب کی تعبیر ہوتی ہے

اسی کو صرف جبر زیست کا ہوتا ہے اندازہ

کہ جس کے پاؤں میں حالات کی زنجیر ہوتی ہے

غرض سے دست برداری ہے معراج آدمیت کی

اسی احساس سے کردار کی تعمیر ہوتی ہے

میں اس کو بھول جانے کا ارادہ جب بھی کرتا ہوں

تو یاد اس کی بڑی شدت سے دامن گیر ہوتی ہے

ضروری ہے ظفرؔ خون جگر کی رنگ آمیزی

بغیر اس کے مکمل کب کوئی تصویر ہوتی ہے

sharik-e-hal jab nakami-e-tadbir hoti hai

to phir wahshat asar har khwab ki taabir hoti hai

usi ko sirf-e-jabr-e-zist ka hota hai andaza

ke jis ke paon mein halat ki zanjir hoti hai

gharaz se dast-e-bardari hai meraj-e-admiyyat ki

isi ehsas se kirdar ki taamir hoti hai

main us ko bhul jane ka irada jab bhi karta hun

tu yad us ki bari shiddat se daman gir hoti hai

zaruri hai zafar khun-e-jigar ki rang amezi

baghair us ke mukammal kab koi taswir hoti hai