مائل بہ دوستی وہ کدھر ہے کدھر نہیں

مائل بہ دوستی وہ کدھر ہے کدھر نہیں

اللہ جانتا ہے مجھے کچھ خبر نہیں

ہر چند کچھ بھی دوریٔ قلب و نظر نہیں

اک دوسرے سے پھر بھی مگر باخبر نہیں

ہر سطح رنگ سے ہے مذاق نظر بلند

جلوہ یہاں کوئی بھی بہ قدر نظر نہیں

ان دیکھی منزلوں کا ہے اس آئنہ میں عکس

یہ میرا دل ہے سنگ سر رہ گزر نہیں

چھا جائے لاکھ چاند ستاروں پہ آدمی

کچھ بھی نہیں جو وسعت قلب و نظر نہیں

دامن غبار سے نہ بچاؤ مسافرو

سرمایۂ سفر ہے یہ گرد سفر نہیں

سستائے کیا ظفرؔ کوئی راہ حیات میں

وہ دھوپ ہے کہ چھاؤں کسی موڑ پر نہیں

mail ba dosti wo kidhar hai kidhar nahin

allah janta hai mujhe kuchh khabar nahin

har chand kuchh bhi duri-e-qalb-o-nazar nahin

ik dusre se phir bhi magar bakhabar nahin

har sath-e-rang se hai mazaq-e-nazar buland

jalwa yahan koi bhi ba qadar-e-nazar nahin

an dekhi manzilon ka hai is aina mein aks

ye mera dil hai sang-e-sar-e-rah guzar nahin

chha jae lakh chand sitaron pe admi

kuchh bhi nahin jo wusat-e-qalb-o-nazar nahin

daman ghubar se na bachao musafiro

sarmaya-e-safar hai ye gard-e-safar nahin

sustae kya zafar koi rah-e-hayat mein

wo dhup hai ke chhaon kisi mor par nahin