زندگی سے مکرنے والوں کو

زندگی سے مکرنے والوں کو

یاد رکھتے ہیں مرنے والوں کو

اس دریچے سے ایک بوڑھا شخص

دیکھتا تھا گزرنے والوں کو

اتنی فرصت نہیں سمٹ جائیں

اور دیکھیں بکھرنے والوں کو

کیا بلندی ہے درمیاں اپنے

چڑھ رہی ہے اترنے والوں کو

کوئی ہچکی بھی اب نہیں آتی

کیا ہوا یاد کرنے والوں کو

کون آواز دے رہا ہے عظیمؔ

اس گلی سے گزرنے والوں کو

zindagi se mukarne walon ko

yad rakhte hain marne walon ko

is dariche se ek burha shakhs

dekhta tha guzarne walon ko

itni fursat nahin simat jaen

aur dekhen bikharne walon ko

kya bulandi hai darmiyan apne

charh rahi hai utarne walon ko

koi hichki bhi ab nahin ati

kya hua yad karne walon ko

kaun awaz de raha hai azim

us gali se guzarne walon ko