روشنی کے جو طلب گار ہوئے ہم دونوں

روشنی کے جو طلب گار ہوئے ہم دونوں

ایک سورج کے خریدار ہوئے ہم دونوں

جو مسیحا کی طرح ہم سے ملا تھا اک دن

اسی بیمار کے بیمار ہوئے ہم دونوں

اس کہانی کا تو لکھنا کبھی ممکن نہ ہوا

جس کہانی کے بھی کردار ہوئے ہم دونوں

چاند ہو تم تو کوئی ایک ستارہ میں ہوں

شام ہوتے ہی نمودار ہوئے ہم دونوں

پھول وہ اور کسی نام کے آئے تھے عظیمؔ

جن کی خوشبو میں گرفتار ہوئے ہم دونوں

raushni ke jo talab gar hue ham donon

ek suraj ke kharidar hue ham donon

jo masiha ki tarah ham se mila tha ik din

isi bimar ke bimar hue ham donon

is kahani ka to likhna kabhi mumkin na hua

jis kahani ke bhi kirdar hue ham donon

chand ho tum to koi ek sitara mein hun

sham hote hi numudar hue ham donon

phul wo aur kisi nam ke ae the azim

jin ki khushbu mein giraftar hue ham donon