اک انوکھی رسم کو زندہ رکھا ہے

اک انوکھی رسم کو زندہ رکھا ہے

خون ہی نے خون کو پسپا رکھا ہے

اب جنون خود نمائی میں تو ہم نے

وحشتوں کا اک دریچہ وا رکھا ہے

شہر کیسے اب حقیقت آشنا ہو

آگہی پر ذات کا پہرہ رکھا ہے

تیرگی کی کیا عجب ترکیب ہے یہ

اب ہوا کے دوش پر دیوا رکھا ہے

تم چراغوں کو بجھانے پر تلے ہو

ہم نے سورج کو بھی اب اپنا رکھا ہے

تم ہمارے خون کی قیمت نہ پوچھو

اس میں اپنے ظرف کا عرصہ رکھا ہے

شہر کی اس بھیڑ میں چل تو رہا ہوں

ذہن میں پر گاؤں کا نقشہ رکھا ہے

یہ عظیمؔ اپنا کمال ظرف ہے جو

دشمنوں کے عیب پر پردہ رکھا ہے

ik anokhi rasm ko zinda rakha hai

khun hi ne khun ko paspa rakha hai

ab junun-e-khud numai mein to ham ne

wahshaton ka ik daricha wa rakha hai

shahr kaise ab haqiqat ashna ho

agahi par zat ka pahra rakha hai

tirgi ki kya ajab tarkib hai ye

ab hawa ke dosh par dewa rakha hai

tum charaghon ko bujhane par tale ho

ham ne suraj ko bhi ab apna rakha hai

tum hamare khun ki qimat na puchho

is main apne zarf ka arsa rakha hai

shahr ki is bhir mein chal to raha hun

zehn mein par gaon ka naqsha rakha hai

ye azim apna kamal-e-zarf hai jo

dushmanon ke aib par parda rakha hai