میں اس کی محبت سے اک دن بھی مکر جاتا

میں اس کی محبت سے اک دن بھی مکر جاتا

کچھ اور نہیں ہوتا اس دل سے اتر جاتا

جس شام گرفتاری قسمت میں مری آئی

اس شام کی لذت سے میں اور بکھر جاتا

خوشبو کے تعاقب نے زنجیر کیا مجھ کو

ورنہ تو یہاں سے میں چپ چاپ گزر جاتا

آواز سماعت تک پہنچی ہی نہیں شاید

وہ ورنہ تسلی کو کچھ دیر ٹھہر جاتا

ذہنوں کے مراسم تھے اک ساتھ بھی ہو جاتے

اک راہ اگر کوئی دیوار میں کر جاتا

تاثیر نہیں رہتی الفاظ کی بندش میں

میں سچ جو نہیں کہتا لہجے کا اثر جاتا

اب تیرے بچھڑنے سے یہ بات کھلی مجھ پر

تو جان اگر ہوتا میں جاں سے گزر جاتا

دل ہم نے عظیمؔ اپنا آسیب زدہ رکھا

جو خواب جنم لیتا وہ خوف سے مر جاتا

main us ki mohabbat se ik din bhi makar jata

kuchh aur nahin hota is dil se utar jata

jis sham giraftari qismat mein miri ai

us sham ki lazzat se main aur bikhar jata

khushbu ke taaqub ne zanjir kiya mujh ko

warna to yahan se main chup chap guzar jata

awaz samaat tak pahunchi hi nahin shayad

wo warna tasalli ko kuchh der thahar jata

zehnon ke marasim the ik sath bhi ho jate

ik rah agar koi diwar mein kar jata

tasir nahin rahti alfaz ki bandish mein

main sach jo nahin kahta lahje ka asar jata

ab tere bichharne se ye bat khuli mujh par

tu jan agar hota main jan se guzar jata

dil ham ne azim apna aseb zada rakha

jo khwab janam leta wo khauf se mar jata