جب سے کسی سے درد کا رشتہ نہیں رہا

جب سے کسی سے درد کا رشتہ نہیں رہا

جینا ہمارا تب سے ہی جینا نہیں رہا

تیرے خیال و خواب ہی رہتے ہیں آس پاس

تنہائی میں بھی میں کبھی تنہا نہیں رہا

آنسو بہے ہیں اتنے کسی کے فراق میں

آنکھوں میں اک بھی وصل کا سپنا نہیں رہا

درپیش آ رہے ہیں وہ حالات آج کل

اپنوں کو اپنوں پر ہی بھروسہ نہیں رہا

نفرت کا زہر پھیلا ہے لیکن کسی میں آج

مل بیٹھ سوچنے کا بھی جذبہ نہیں رہا

دار و مدار زندگی جس پر تھا وہ بھی تو

جیسا سمجھتے تھے اسے ویسا نہیں رہا

یہ نسل نو ہے اتنی مہذب کہ اس میں آج

درویشؔ گفتگو کا سلیقہ نہیں رہا

jab se kisi se dard ka rishta nahin raha

jina hamara tab se hi jina nahin raha

tere khayal-o-khwab hi rahte hain as pas

tanhai mein bhi main kabhi tanha nahin raha

ansu bahe hain itne kisi ke firaq mein

ankhon mein ik bhi wasl ka sapna nahin raha

darpesh a rahe hain wo halat aj kal

apnon ko apnon par hi bharosa nahin raha

nafrat ka zahr phaila hai lekin kisi mein aj

mil baith sochne ka bhi jazba nahin raha

dar-o-madar-e-zindagi jis par tha wo bhi to

jaisa samajhte the use waisa nahin raha

ye nasl-e-nau hai itni mohazzab ke is mein aj

darwesh guftugu ka saliqa nahin raha