ابد ہونے کا تجربہ کیا ہے

ابد ہونے کا تجربہ کیا ہے

اس نے سونے کا تجربہ کیا ہے

تم انہیں بارشیں سمجھتے ہو

ہم نے رونے کا تجربہ کیا ہے

یہ پرندہ نہ ڈوبتا اس نے

پر بھگونے کا تجربہ کیا ہے

اس نے ناخن بڑھائے اور ہم نے

زخم ہونے کا تجربہ کیا ہے

ایک پتھر اٹھا کے چادر میں

سنگ ڈھونے کا تجربہ کیا ہے

ہم سے کھیلا گیا ہے سچ مچ میں

یا کھلونے کا تجربہ کیا ہے

اس کی آنکھوں میں ہم نہیں ڈوبے

یوں ہی کھونے کا تجربہ کیا ہے