دکھا رہا ہوں تماشہ سمجھ میں آ جائے

دکھا رہا ہوں تماشہ سمجھ میں آ جائے

کہ ایک بار اسے دنیا سمجھ میں آ جائے

یہ لوگ جا تو رہے ہیں نئے زمانے میں

دعا کرو انہیں رستہ سمجھ میں آ جائے

غلط نہ جان کہ آنکھیں نہیں رہیں میری

سو چھو رہا ہوں کہ چہرہ سمجھ میں آ جائے

خدا کرے تجھے تہذیب مے کشی ہو نصیب

خدا کرے تجھے نشہ سمجھ میں آ جائے

یہ لوگ جنگ کی باتیں نہیں کریں گے اگر

گلی میں کھیلتا بچہ سمجھ میں آ جائے

ہم اس کو اپنا سمجھتے ہیں اپنا مانتے ہیں

جسے ہمارا علاقہ سمجھ میں آ جائے

ندیمؔ دوسرا ان کو دکھائی دیتا نہیں

ندیمؔ جن کو بھی پہلا سمجھ میں آ جائے