Arooz is now on the App Store, for iPhone and iPad. Download →

All poetry

مل رہے ہو بڑی عقیدت سے

Nadeem Bhabha (b. 1977)

مل رہے ہو بڑی عقیدت سے

خوف آتا ہے اتنی عزت سے

ہم زیادہ بگاڑ دیتے ہیں

بچ کے رہنا ہماری صحبت سے

لوگ کردار بننا چاہتے ہیں

جیسے ممکن ہے سب ریاضت سے

اس کے دل میں اترنے لگتا ہوں

جو مجھے دیکھتا ہے نفرت سے

زہر ایجاد ہو گیا اک دن

لوگ مرتے تھے پہلے غیرت سے

پردہ داروں نے خود کشی کر لی

صحن جھانکا گیا کسی چھت سے

فاصلے بڑھ گئے رفاقت میں

دوریاں پڑ گئی ہیں قربت سے

اس نے مجھ کو بھلا دیا اک دن

اور بھلایا بھی کس سہولت سے

اپنی گردن جھکا کے بات کرو

تم نکالے گئے ہو جنت سے