Arooz is now on the App Store, for iPhone and iPad. Download →

All poetry

دیکھو اس کا ہجر نبھانا پڑتا ہے

Nadeem Bhabha (b. 1977)

دیکھو اس کا ہجر نبھانا پڑتا ہے

وہ جیسا چاہے ہو جانا پڑتا ہے

سنتے کب ہیں لوگ ہمیں بس دیکھتے ہیں

چہرے کو آواز بنانا پڑتا ہے

ان اندھے اور بہرے لوگوں کو سائیں

ہونے کا احساس دلانا پڑتا ہے

ابھی ہمارے اندر آگ نہیں بھڑکی

ابھی ہمیں سگریٹ سلگانا پڑتا ہے

کچھ آنکھیں ہی ایسی ہوتی ہیں جن کو

کوئی نہ کوئی خواب دکھانا پڑتا ہے

اس دنیا کو چھوڑ کے جس میں تم بھی ہو

جاتا کون ہے لیکن جانا پڑتا ہے

کچھ پھولوں کی خاطر بھی کچھ پھولوں کا

سب سے اچھا رنگ چرانا پڑتا ہے