خون دل مجھ سے ترا رنگ حنا مانگے ہے

خون دل مجھ سے ترا رنگ حنا مانگے ہے

یا ہتھیلی پہ کوئی نقش وفا مانگے ہے

جو سدا دیتا رہا دار و رسن تحفے میں

ہم فقیروں سے وہی حرف دعا مانگے ہے

کیا ہوا ہے کہ رفاقت کا بھرم رکھنے کو

مجھ سے محبوب مرا زخم نیا مانگے ہے

شہر میں دھنستا ہے فتنے کی نئی دلدل میں

کیا قیامت ہے کہ میرا ہی پتہ مانگے ہے

کچھ سمجھ میں نہیں آتا ہے مزاج یاراں

جس کو دیکھو وہی اظہار وفا مانگے ہے

وہ تو وحشت میں کبھی سمجھے ہے مجھ کو قاتل

اور کبھی کوچۂ قاتل کا پتا مانگے ہے

عقل پر پردہ پڑا ہے کہ سخنور انجمؔ

دن کے ماحول میں بھی کالی ردا مانگے ہے

khun-e-dil mujh se tira rang-e-hina mange hai

ya hatheli pe koi naqsh-e-wafa mange hai

jo sada deta raha dar-o-rasan tohfe mein

ham faqiron se wahi harf-e-dua mange hai

kya hua hai ke rifaqat ka bharam rakhne ko

mujh se mahbub mira zakhm naya mange hai

shahr mein dhansta hai fitne ki nai daldal mein

kya qayamat hai ke mera hi pata mange hai

kuchh samajh mein nahin ata hai mizaj-e-yaran

jis ko dekho wahi izhar-e-wafa mange hai

wo to wahshat mein kabhi samjhe hai mujh ko qatil

aur kabhi kucha-e-qatil ka pata mange hai

aql par parda para hai ke sukhanwar anjum

din ke mahaul mein bhi kali rida mange hai