ہجوم درد ملا امتحان ایسا تھا

ہجوم درد ملا امتحان ایسا تھا

مگر وہ چپ ہی رہا بے زبان ایسا تھا

کسی کی عزت و ناموس پر نہ آنچ آئی

لٹا تو اف بھی نہ کی مہربان ایسا تھا

زمانہ گزرا مگر داغ رہ گیا دل پر

نہ مٹ سکا کسی صورت نشان ایسا تھا

بدن کی شاخ سے اس کے کرن جو لپٹی تھی

وہ سہہ سکا نہ اسے دھان پان ایسا تھا

متاع زیست لٹا دی گئی مگر اس نے

ذرا بھی قدر نہ کی بد گمان ایسا تھا

نظر شناس تھا کیسا کہ عمر بھر انجمؔ

بھلا سکا نہ اسے میہمان ایسا تھا

hujum-e-dard mila imtihan aisa tha

magar wo chup hi raha be zaban aisa tha

kisi ki izzat-o-namus par na anch ai

luta to uf bhi na ki mehrban aisa tha

zamana guzra magar dagh rah gaya dil par

na mit saka kisi surat nishan aisa tha

badan ki shakh se us ke kiran jo lipti thi

wo sah saka na use dhan pan aisa tha

mata-e-zist luta di gai magar us ne

zara bhi qadr na ki bad guman aisa tha

nazar shanas tha kaisa ke umr bhar anjum

bhula saka na use mehman aisa tha