ہم نے جب چاہا کوئی آگ بجھانے آئے

ہم نے جب چاہا کوئی آگ بجھانے آئے

آئے تو لوگ مگر دل کو جلانے آئے

کچھ اثر ہوتا نہیں بزم طرب کا دل پر

درد کا گیت کوئی آج سنانے آئے

راس جب آ نہ سکا شہر خرد کا ماحول

وسعت دشت و بیاباں میں دوانے آئے

بھاگی جاتی ہے یہ دنیا نئی رونق کی طرف

شہر ہے اجڑا ہوا کون بسانے آئے

آج تک جن کو نہیں راہ صداقت کی خبر

حق و باطل کا وہی فرق بتانے آئے

کیوں کسی غیر پہ الزام میں رکھتا انجمؔ

میرے اپنے وہ سبھی تھے جو رلانے آئے

ham ne jab chaha koi ag bujhane ae

ae to log magar dil ko jalane ae

kuchh asar hota nahin bazm-e-tarab ka dil par

dard ka git koi aj sunane ae

ras jab a na saka shahr-e-khirad ka mahaul

wusat-e-dasht-o-bayaban mein diwane ae

bhagi jati hai ye duniya nai raunaq ki taraf

shahr hai ujra hua kaun basane ae

aj tak jin ko nahin rah sadaqat ki khabar

haq-o-batil ka wahi farq batane ae

kyun kisi ghair pe ilzam mein rakhta anjum

mere apne wo sabhi the jo rulane ae