تشنگئ لب پہ ہم عکس آب لکھیں گے

تشنگئ لب پہ ہم عکس آب لکھیں گے

جن کا گھر نہیں کوئی گھر کے خواب لکھیں گے

تم کو کیا خبر اس کی زندگی پہ کیا بیتی

زندگی کے زخموں پر ہم کتاب لکھیں گے

جس ہوا نے کاٹی ہیں خامشی کی زنجیریں

اس ہوا کے لہجے کو انقلاب لکھیں گے

جھوٹ کی پرستش میں عمر جن کی گزری ہے

تیرگیٔ شب کو وہ آفتاب لکھیں گے

شعر کی صداقت پر ہم یقین رکھتے ہیں

مصلحت کے چہروں کو با نقاب لکھیں گے

سولیوں پہ جھولے گا بد نہاد ہر منصف

منصفی کا جب بھی ہم خود نصاب لکھیں گے

غم نہیں جو خوابوں کی لٹ گئی ہیں تعبیریں

ہم نظر کے طاقوں میں اور خواب لکھیں گے

حرز جاں سمجھتے ہیں ہم وطن کی مٹی کو

اپنے گھر کے خاروں کو ہم گلاب لکھیں گے

اس غزل کے پرتو میں بے گھروں کی باتیں ہیں

بے گھروں کے نام اس کا انتساب لکھیں گے

ہر دلیل کاٹیں گے ہم دلیل روشن سے

بخشؔ سو سوالوں کا اک جواب لکھیں گے

tishnagi-e-lab pe ham aks ab likhenge

jin ka ghar nahin koi ghar ke khwab likhenge

tum ko kya khabar us ki zindagi pe kya biti

zindagi ke zakhmon par ham kitab likhenge

jis hawa ne kati hain khamushi ki zanjiren

is hawa ke lahje ko inqilab likhenge

jhut ki parastish mein umr jin ki guzri hai

tirgi-e-shab ko wo aftab likhenge

sher ki sadaqat par ham yaqin rakhte hain

maslahat ke chehron ko ba naqab likhenge

suliyon pe jhulega bad nihad har munsif

munsifi ka jab bhi ham khud nisab likhenge

gham nahin jo khwabon ki lut gai hain taabiren

ham nazar ke taqon mein aur khwab likhenge

hirz-e-jan samajhte hain ham watan ki mitti ko

apne ghar ke kharon ko ham gulab likhenge

is ghazal ke partau mein be gharon ki baten hain

be gharon ke nam us ka intisab likhenge

har dalil katenge ham dalil-e-raushan se

bakhsh so sawalon ka ik jawab likhenge