قاتل ہوا خموش تو تلوار بول اٹھی

قاتل ہوا خموش تو تلوار بول اٹھی

مقتل میں خون گرم کی ہر دھار بول اٹھی

پوچھا سبک سروں کا نمائندہ کون ہے

سن کر فقیہ شہر کی دستار بول اٹھی

اہل ستم کے خوف سے جو چپ تھی وہ زباں

جب بولنے پہ آئی سر دار بول اٹھی

میری تباہیوں کی ہے اس میں خبر ضرور

از خود ہر ایک سرخیٔ اخبار بول اٹھی

چہرہ تھا زخم زخم کوئی پوچھتا نہ تھا

یوسف بنے تو گرمئ بازار بول اٹھی

اک ناخدا ہی یورش طوفاں پہ چپ رہا

چپو کبھی تو اور کبھی پتوار بول اٹھی

کچھ اس طرح سے نقش تھے اینٹوں پہ سانچے کے

زنداں میں مجھ کو دیکھ کے دیوار بول اٹھی

qatil hua khamosh to talwar bol uthi

maqtal mein khun-e-garm ki har dhar bol uthi

puchha subuk saron ka numainda kaun hai

sun kar faqih-e-shahr ki dastar bol uthi

ahl-e-sitam ke khauf se jo chup thi wo zaban

jab bolne pe ai sar-e-dar bol uthi

meri tabahiyon ki hai is mein khabar zarur

az khud har ek surkhi-e-akhbar bol uthi

chehra tha zakhm zakhm koi puchhta na tha

yusuf bane to garmi-e-bazar bol uthi

ik nakhuda hi yurish-e-tufan pe chup raha

chapo kabhi to aur kabhi patwar bol uthi

kuchh is tarah se naqsh the inton pe sanche ke

zindan mein mujh ko dekh ke diwar bol uthi