یہ شہر طرب دیکھ بیابان میں کیا ہے

یہ شہر طرب دیکھ بیابان میں کیا ہے

اے طائر وحشت ترے امکان میں کیا ہے

جگنو کی طرح پھرتے ہیں تارے مرے دل میں

کس سوچ میں گم ہوں یہ مرے دھیان میں کیا ہے

کیا ان پہ گزرتی ہے سنو ان کی زبانی

زخموں سے کبھی پوچھو نمک دان میں کیا ہے

انکار سے اقرار کا رشتہ ہے بھلا کیا

یہ کفر کی صورت مرے ایمان میں کیا ہے

یادوں کی گھنی چھاؤں ہے یا غم کی سیاہی

اشجار صفت صحن دل و جان میں کیا ہے

ye shahr-e-tarab dekh bayaban mein kya hai

ai tair-e-wahshat tire imkan mein kya hai

jugnu ki tarah phirte hain tare mire dil mein

kis soch mein gum hun ye mire dhyan mein kya hai

kya un pe guzarti hai suno un ki zabani

zakhmon se kabhi puchho namak dan mein kya hai

inkar se iqrar ka rishta hai bhala kya

ye kufr ki surat mire iman mein kya hai

yadon ki ghani chhaon hai ya gham ki siyahi

ashjar sifat sehn-e-dil-o-jan mein kya hai