دریا جو چڑھا ہے وہ اترنے نہیں دینا

دریا جو چڑھا ہے وہ اترنے نہیں دینا

یہ لمحۂ موجود گزرنے نہیں دینا

دنیا ہی نہیں دل کو بھی اس شہر ہوس میں

من مانی کسی حال میں کرنے نہیں دینا

محسوس نہیں ہوگی مسیحا کی ضرورت

یہ زخم ہی ایسا ہے کہ بھرنے نہیں دینا

مشکل ہے مگر کام یہ کرنا ہی پڑے گا

انسان کو انسان سے ڈرنے نہیں دینا

جس خواب میں روپوش ہو جینے کی تمنا

وہ خواب دل آویز بکھرنے نہیں دینا

گر دل کو جلا کر بھی دھواں کرنا پڑے تو

ان پودوں کو کہرے میں ٹھٹھرنے نہیں دینا

dariya jo charha hai wo utarne nahin dena

ye lamha-e-maujud guzarne nahin dena

duniya hi nahin dil ko bhi is shahr-e-hawas mein

man mani kisi hal mein karne nahin dena

mahsus nahin hogi masiha ki zarurat

ye zakhm hi aisa hai ke bharne nahin dena

mushkil hai magar kam ye karna hi parega

insan ko insan se darne nahin dena

jis khwab mein ruposh ho jine ki tamanna

wo khwab dil awez bikharne nahin dena

gar dil ko jala kar bhi dhuan karna pare to

in paudon ko kohre mein thitharne nahin dena