Arooz is now on the App Store, for iPhone and iPad. Download →

All poetry

اب یہ صفت جہاں میں نایاب ہو گئی ہے

Obaid Siddiqi (1957–2020)

اب یہ صفت جہاں میں نایاب ہو گئی ہے

ململ بدن پہ اس کے کمخواب ہو گئی ہے

کوئی پتہ دے اس کو میری کتاب جاں کا

دنیا کے ساتھ وہ بھی اک باب ہو گئی ہے

پھولوں بھری زمیں ہو خوشبو بھری ہوں سانسیں

یہ آرزو بھی میری کیا خواب ہو گئی ہے

میں بس یہ کہہ رہا ہوں رسم وفا جہاں میں

بالکل نہیں مٹی ہے کم یاب ہو گئی ہے

تکمیل پا رہا ہے یہ کس کے گھر کا نقشہ

دیواریں اٹھ چکی ہیں محراب ہو گئی ہے

چشمے ابل رہے ہیں دشت و جبل سے کیسے

کیا یہ زمین اتنی سیراب ہو گئی ہے