تری نسبت سے اپنی ذات کا ادراک کرنے میں

تری نسبت سے اپنی ذات کا ادراک کرنے میں

بہت عرصہ لگا ہے پیرہن کو چاک کرنے میں

تری بستی کے باشندے بہت آسودہ خاطر ہیں

تکلف ہو رہا ہے درد کو پوشاک کرنے میں

ہم اپنے جسم کا سونا سفر پر لے کے نکلے ہیں

مگر ڈرتے ہیں اس کو راستوں کی خاک کرنے میں

فقط اک دیدۂ تر ہے کہ جو سیراب کرتا ہے

سمندر سوکھ جاتے ہیں بدن نمناک کرنے میں

ہمارے ساتھ کچھ گزرے ہوئے موسم بھی شامل ہیں

تماشا گاہ عالم تجھ کو عبرت ناک کرنے میں

tiri nisbat se apni zat ka idrak karne mein

bahut arsa laga hai pairahan ko chak karne mein

tiri basti ke bashinde bahut asuda khatir hain

takalluf ho raha hai dard ko poshak karne mein

ham apne jism ka sona safar par le ke nikle hain

magar darte hain us ko raston ki khak karne mein

faqat ik dida-e-tar hai ke jo sairab karta hai

samundar sukh jate hain badan namnak karne mein

hamare sath kuchh guzre hue mausam bhi shamil hain

tamasha gah-e-alam tujh ko ibrat nak karne mein