جو پی رہا ہے سدا خون بے گناہوں کا

جو پی رہا ہے سدا خون بے گناہوں کا

وہ شخص تو ہے نمائندہ کج کلاہوں کا

جسے بھی چاہا صلیب ستم پہ کھینچ دیا

فقیہ شہر تو قائل نہیں گواہوں کا

ہم اہل دل ہیں صداقت ہمارا شیوہ ہے

ہمیں ڈرا نہ سکے گا جلال شاہوں کا

ہر ایک قدر کو رسوائیاں ملیں ان سے

عجیب سا رہا کردار دیں پناہوں کا

مری زمین کو مقبوضہ تو زمیں نہ سمجھ

کہ ٹوٹنے کو ہے افسوں تری سپاہوں کا

ابھی تو عزم سفر بھی کیا نہ تھا ہم نے

کہ جاگ اٹھا ہر اک ذرہ شاہراہوں کا

jo pi raha hai sada khun-e-be gunahon ka

wo shakhs to hai numainda kaj kulahon ka

jise bhi chaha salib-e-sitam pe khinch diya

faqih-e-shahr to qail nahin gawahon ka

ham ahl-e-dil hain sadaqat hamara shewa hai

hamen dara na sakega jalal shahon ka

har ek qadar ko ruswaiyan milen un se

ajib sa raha kirdar den panahon ka

miri zamin ko maqbuza to zamin na samajh

ke tutne ko hai afsun tiri sipahon ka

abhi to azm-e-safar bhi kiya na tha ham ne

ke jag utha har ik zarra shahrahon ka