کتنے آزار مقدر سے لگے رہتے ہیں

کتنے آزار مقدر سے لگے رہتے ہیں

تیرے بیمار تو بستر سے لگے رہتے ہیں

کبھی تجھ بالا نشیں کو بھی خبر پہنچے گی

کتنے سر ہیں جو ترے در سے لگے رہتے ہیں

شام ہوتی ہے تو کام اور بھی بڑھ جاتا ہے

ان گنت یادوں کے دفتر سے لگے رہتے ہیں

تیری فرقت میں کسے جادہ و منزل کا دماغ

غم کے مارے کسی پتھر سے لگے رہتے ہیں

ہم بھلا دیں گے زمانے کا چلن بھی لیکن

شیشۂ دل پہ جو پتھر سے لگے رہتے ہیں

آج بھی کوچۂ جاناں کی وہی رونق ہے

اب بھی کچھ لوگ برابر سے لگے رہتے ہیں

kitne azar muqaddar se lage rahte hain

tere bimar to bistar se lage rahte hain

kabhi tujh bala nashin ko bhi khabar pahunchegi

kitne sar hain jo tire dar se lage rahte hain

sham hoti hai to kam aur bhi barh jata hai

an ginat yadon ke daftar se lage rahte hain

teri furqat mein kise jada-o-manzil ka dimagh

gham ke mare kisi patthar se lage rahte hain

ham bhula denge zamane ka chalan bhi lekin

shisha-e-dil pe jo patthar se lage rahte hain

aj bhi kucha-e-janan ki wahi raunaq hai

ab bhi kuchh log barabar se lage rahte hain