Arooz is now on the App Store, for iPhone and iPad. Download →

All poetry

اک لمحہ جو فرقت کے سوا اور بھی کچھ تھا

Yahya Khan Yusuf Zai (b. 1981)

اک لمحہ جو فرقت کے سوا اور بھی کچھ تھا

اک غم جو قیامت کے سوا اور بھی کچھ تھا

اک چہرہ نگاہوں کے لیے فیض رساں تھا

اک خواب زیارت کے سوا اور بھی کچھ تھا

اک نقش تصور کے پرے بھی تھا مجسم

اک وہم حقیقت کے سوا اور بھی کچھ تھا

اک داغ جو رکھتا تھا مرے سینے کو روشن

اک نام جو تہمت کے سوا اور بھی کچھ تھا

اک صوت محض رونق ویرانیٔ دل تھی

اک گل دم وحشت کے سوا اور بھی کچھ تھا

اک یاد خیالوں کے علاوہ بھی تھی موجود

اک زخم اذیت کے سوا اور بھی کچھ تھا

یہ دور قیامت کا جسے ہم نے گزارا

اک عمر کی مہلت کے سوا اور بھی کچھ تھا