Arooz is now on the App Store, for iPhone and iPad. Download →

All poetry

تری یادوں کے چراغوں میں یہ جلتی ہوئی رات

Yahya Khan Yusuf Zai (b. 1981)

تری یادوں کے چراغوں میں یہ جلتی ہوئی رات

مری آنکھوں سے چھلکتی رہی ڈھلتی ہوئی رات

سم امروز سے مارا ہوا ہارا ہوا دن

کسی فردا کی امیدوں پہ بہلتی ہوئی رات

کبھی آنکھوں میں رکے کوئی گزرتا ہوا پل

کبھی سانسوں میں اٹک جاتی ہے چلتی ہوئی رات

نہ ٹلا ہے کبھی زخموں میں سلگتا ہوا دن

نہ تھمی ہے کبھی اشکوں میں ابلتی ہوئی رات

مرے ہاتھوں کی لکیروں میں مشقت دن کی

مرے خوابوں کے مقدر میں ہے ڈھلتی ہوئی رات