دیدۂ بے رنگ میں خوں رنگ منظر رکھ دیے

دیدۂ بے رنگ میں خوں رنگ منظر رکھ دیے

ہم نے اس دشت تپاں میں بھی سمندر رکھ دیے

وہ جگہ جو لعل و گوہر کے لیے مقصود تھی

کس نے یہ سنگ ملامت اس جگہ پر رکھ دیے

اب کسی کی چیخ کیا ابھرے کہ میر شہر نے

ساکنان شہر کے سینوں پہ پتھر رکھ دیے

شاخساروں پر نہ جب اذن نشیمن مل سکا

ہم نے اپنے آشیاں دوش ہوا پر رکھ دیے

اہل زر نے دیکھ کر کم ظرفی اہل قلم

حرص زر کے ہر ترازو میں سخن ور رکھ دیے

ہم تو ابریشم کی صورت نرم و نازک تھے مگر

تلخئ حالات نے لہجے میں خنجر رکھ دیے

جس ہوا کو وہ سمجھتے تھے کہ چل سکتی نہیں

اس ہوا نے کاٹ کر لشکر کے لشکر رکھ دیے

بخشؔ صیاد ازل نے حکم آزادی کے ساتھ

اور اسیری کے بھی خدشے دل کے اندر رکھ دیے

dida-e-be rang mein khun rang manzar rakh diye

ham ne is dasht-e-tapan mein bhi samundar rakh diye

wo jagah jo laal-o-gauhar ke liye maqsud thi

kis ne ye sang-e-malamat is jagah par rakh diye

ab kisi ki chikh kya ubhre ke mir-e-shahr ne

sakinan-e-shahr ke sinon pe patthar rakh diye

shakhsaron par na jab izn-e-nasheman mil saka

ham ne apne ashiyan dosh hawa par rakh diye

ahl-e-zar ne dekh kar kam zarfi-e-ahl-e-qalam

hirs-e-zar ke har tarazu mein sukhan war rakh diye

ham to abresham ki surat narm-o-nazuk the magar

talkhi-e-halat ne lahje mein khanjar rakh diye

jis hawa ko wo samajhte the ke chal sakti nahin

is hawa ne kat kar lashkar ke lashkar rakh diye

bakhsh sayyad-e-azal ne hukm azadi ke sath

aur asiri ke bhi khadshe dil ke andar rakh diye