فضائے آدمیت کو سنورنے ہی نہیں دیتے

فضائے آدمیت کو سنورنے ہی نہیں دیتے

سیاست داں دلوں کے زخم بھرنے ہی نہیں دیتے

زمانہ وہ بھی تھا جب حادثے کا ڈر ستاتا تھا

مگر اب حادثے لوگوں کو ڈرنے ہی نہیں دیتے

کچھ ہم نے خواب ایسے پال رکھے ہیں کہ جو ہم کو

حقیقت کی زمیں پر پاؤں رکھنے ہی نہیں دیتے

یہ مانا عشق سے بنتی ہے جنت زندگی لیکن

مسائل زندگی سے عشق کرنے ہی نہیں دیتے

گزر گاہوں کے آگے منزلیں آواز دیتی ہیں

مگر ٹھہرے ہوئے لمحے گزرنے ہی نہیں دیتے

بشرؔ بے رحم ہیں یہ پربتوں جیسے اصول اپنے

کسی کے دل کی وادی میں اترنے ہی نہیں دیتے

faza-e-admiyyat ko sanwarne hi nahin dete

siyasat dan dilon ke zakhm bharne hi nahin dete

zamana wo bhi tha jab hadse ka dar satata tha

magar ab hadse logon ko darne hi nahin dete

kuchh ham ne khwab aise pal rakhe hain ke jo ham ko

haqiqat ki zamin par paon rakhne hi nahin dete

ye mana ishq se banti hai jannat zindagi lekin

masail zindagi se ishq karne hi nahin dete

guzar gahon ke age manzilen awaz deti hain

magar thahre hue lamhe guzarne hi nahin dete

bashar be rahm hain ye parbaton jaise usul apne

kisi ke dil ki wadi mein utarne hi nahin dete