دل میں ان کی یادوں کے جب دئے جلاتے ہیں

دل میں ان کی یادوں کے جب دئے جلاتے ہیں

دامن تخیل پر پھول مسکراتے ہیں

تم شکست دل پر کیوں اس قدر پریشاں ہو

آئینوں کا کیا وہ تو یوں ہی ٹوٹ جاتے ہیں

آپ سے تو قربت میں فاصلے رہے قائم

لوگ تو قریب آ کر راہ بھول جاتے ہیں

رات یوں گزرتی ہے کشمکش کے ماروں کی

اک دیا جلاتے ہیں اک دیا بجھاتے ہیں

جب نگاہ پڑتی ہے زندگی کے چہرے پر

آنکھیں ڈبڈباتی ہیں ہونٹ تھرتھراتے ہیں

یاد سے مزین ہے آج بھی دل سنبلؔ

لوگ بیتے لمحوں کو کس طرح بھلاتے ہیں

dil mein un ki yadon ke jab diye jalate hain

daman-e-takhayyul par phul muskurate hain

tum shikast-e-dil par kyun is qadar pareshan ho

ainon ka kya wo to yun hi tut jate hain

ap se to qurbat mein fasle rahe qaim

log to qarib a kar rah bhul jate hain

rat yun guzarti hai kashmakash ke maron ki

ik diya jalate hain ik diya bujhate hain

jab nigah parti hai zindagi ke chehre par

ankhen dabdbati hain hont thartharate hain

yad se muzayyan hai aj bhi dil-e-sumbul

log bite lamhon ko kis tarah bhulate hain