میں بکھر نہ جاؤں ورق ورق مجھے طاق دل میں سجائیے

میں بکھر نہ جاؤں ورق ورق مجھے طاق دل میں سجائیے

مرا حرف حرف ہے بے بہا مجھے اس طرح نہ مٹائیے

ہے کدورتوں کے حصار میں یہ محبتوں کا حسیں نگر

یہ دیار آب حیات ہے اسے سم کدہ نہ بنائیے

کوئی عکس تک نہ ٹھہر سکا مری چشم فکر و خیال میں

ابھی اجنبی سے ہیں خال و خد مجھے آئنہ نہ دکھائیے

پس ظلم آپ کی بخششیں یہ عنایتیں یہ سخاوتیں

کوئی مانگ بیٹھے نہ خوں بہا یہ لہو کے داغ چھپائیے

ہو دلوں میں حسن قلندری ہو زباں پہ نعرۂ سرمدی

جو ہلا دے تخت سکندری وہی کج کلاہی دکھائیے

ہے خزاں کی زد پہ ابھی تلک رخ سنبلؔ دل یاسمیں

ابھی انتظار کا وقت ہے ابھی جشن گل نہ منائیے

main bikhar na jaun waraq waraq mujhe taq-e-dil mein sajaiye

mira harf harf hai be baha mujhe is tarah na mitaiye

hai kuduraton ke hisar mein ye mohabbaton ka hasin nagar

ye dayar-e-ab-e-hayat hai use sam kada na banaiye

koi aks tak na thahar saka miri chashm-e-fikr-o-khayal mein

abhi ajnabi se hain khal-o-khad mujhe aina na dikhaiye

pas zulm ap ki bakhshishen ye inayaten ye sakhawaten

koi mang baithe na khun baha ye lahu ke dagh chhupaiye

ho dilon mein husn qalandari ho zaban pe naara-e-sarmadi

jo hila de takht-e-sikandari wahi kaj kulahi dikhaiye

hai khizan ki zad pe abhi talak rukh sumbul dil yasmin

abhi intizar ka waqt hai abhi jashn-e-gul na manaiye