جب عزم کے شعلوں کو ہمت نے ہوا دی ہے

جب عزم کے شعلوں کو ہمت نے ہوا دی ہے

طوفاں نے ہی ساحل کی تصویر دکھا دی ہے

شعلوں سے گلہ کیسا بجلی سے شکایت کیا

گلشن کے نگہباں نے ہر شاخ جلا دی ہے

چاہا تھا کریں ان سے کچھ شکوۂ بے مہری

لب ہلنے سے پہلے ہی سوگند کھلا دی ہے

اک وہ بھی ہیں مرتے ہیں جو ننگ وفا بن کر

ہر وار پہ ہم نے تو قاتل کو دعا دی ہے

کانپ اٹھا ہے جانے کیوں ہر تار نفس سنبلؔ

جب میرے بزرگوں نے جینے کی دعا دی ہے

jab azm ke sholon ko himmat ne hua di hai

tufan ne hi sahil ki taswir dikha di hai

sholon se gila kaisa bijli se shikayat kya

gulshan ke nigahban ne har shakh jala di hai

chaha tha karen un se kuchh shikwa-e-be mehri

lab hilne se pahle hi saugand khula di hai

ik wo bhi hain marte hain jo nang-e-wafa ban kar

har war pe ham ne to qatil ko dua di hai

kanp utha hai jane kyun har tar-e-nafas sumbul

jab mere buzurgon ne jine ki dua di hai