حسین تاج کی صورت یہ بے صدا پتھر

حسین تاج کی صورت یہ بے صدا پتھر

دکھا رہے ہیں محبت کا معجزہ پتھر

ثبوت سنگ دلی اس سے بڑھ کے کیا ہوگا

جو پھول پھینکا مری سمت بن گیا پتھر

تمہارے شہر کو میں کیوں نہ کامروپ کہوں

کہ اک نگاہ نے مجھ کو بنا دیا پتھر

سمجھ سکے نہ کبھی مصلحت زمانے کی

بس اس قصور پہ کھائے ہیں بارہا پتھر

کریں گے اب نہ گلہ تم سے بے وفائی کا

لو آج ہم نے کلیجے پہ رکھ لیا پتھر

سنا رہے ہیں کہانی وفا پرستوں کی

سجے ہوئے ہیں جو مقتل میں جا بجا پتھر

hasin taj ki surat ye be sada patthar

dikha rahe hain mohabbat ka mojiza patthar

subut sang dili is se barh ke kya hoga

jo phul phenka miri samt ban gaya patthar

tumhare shahr ko main kyun na kamrup kahun

ke ik nigah ne mujh ko bana diya patthar

samajh sake na kabhi maslahat zamane ki

bas is qusur pe khae hain barha patthar

karenge ab na gila tum se be wafai ka

lo aj ham ne kaleje pe rakh liya patthar

suna rahe hain kahani wafa paraston ki

saje hue hain jo maqtal mein ja baja patthar