گزرے ہیں ہم پہ ایسے بھی لمحے کبھی کبھی

گزرے ہیں ہم پہ ایسے بھی لمحے کبھی کبھی

دل رو پڑا ہے سن کے لطیفے کبھی کبھی

صحرا سے تشنگی کا سبب پوچھتے ہو کیا

دریا بھی ہم نے دیکھے ہیں پیاسے کبھی کبھی

گم کردہ راہ زیست سہی اس کے باوجود

پوچھے ہیں ہم سے خضر نے رستے کبھی کبھی

اے نا خدائے وقت نہ اتنا غرور کر

ڈوبے ہیں ساحلوں پہ سفینے کبھی کبھی

ہر دل کو آپ آئنہ خانہ نہ جانیے

پتھر سے سخت ہوتے ہیں شیشے کبھی کبھی

سنبلؔ ہوا ہے یہ بھی کہ غزلوں کے روپ میں

نازل ہوئے ہیں ہم پہ صحیفے کبھی کبھی

guzre hain ham pe aise bhi lamhe kabhi kabhi

dil ro para hai sun ke latife kabhi kabhi

sahra se tishnagi ka sabab puchhte ho kya

dariya bhi ham ne dekhe hain pyase kabhi kabhi

gum karda rah-e-zist sahi is ke bawajud

puchhe hain ham se khizr ne raste kabhi kabhi

ai na khuda-e-waqt na itna ghurur kar

dube hain sahilon pe safine kabhi kabhi

har dil ko ap aina khana na janiye

patthar se sakht hote hain shishe kabhi kabhi

sumbul hua hai ye bhi ke ghazlon ke rup mein

nazil hue hain ham pe sahife kabhi kabhi