ایک اک لمحے کو پلکوں پہ سجاتا ہوا گھر

ایک اک لمحے کو پلکوں پہ سجاتا ہوا گھر

راس آتا ہے کسے ہجر مناتا ہوا گھر

خواب کے خدشے سے اب نیند اڑی جاتی ہے

میں نے دیکھا ہے اسے چھوڑ کے جاتا ہوا گھر

گر زباں ہوتی تو پتھر ہی بتاتا سب کو

کس قدر ٹوٹا ہے وہ خود کو بناتا ہوا گھر

اس کا اب ذکر نہ کر چھوڑ کے جانے والے

تو نے دیکھا ہی کہاں اشک بہاتا ہوا گھر

اب اسے یاد کہوں یاس کہوں یا وحشت

مجھ کو آتا ہے نظر خاک اڑاتا ہوا گھر

تھک گیا کیا مرے طولانی سفر سے عادلؔ

سو گیا ساتھ مرے مجھ کو سلاتا ہوا گھر

ek ik lamhe ko palkon pe sajata hua ghar

ras ata hai kise hijr manata hua ghar

khwab ke khadshe se ab nind uri jati hai

main ne dekha hai use chhor ke jata hua ghar

gar zaban hoti to patthar hi batata sab ko

kis qadar tuta hai wo khud ko banata hua ghar

us ka ab zikr na kar chhor ke jane wale

tu ne dekha hi kahan ashk bahata hua ghar

ab use yad kahun yas kahun ya wahshat

mujh ko ata hai nazar khak urata hua ghar

thak gaya kya mire tulani safar se adil

so gaya sath mire mujh ko sulata hua ghar