شوق کی کم نگہی بھی ہے گوارا مجھ کو

شوق کی کم نگہی بھی ہے گوارا مجھ کو

غم تو غم آج خوشی بھی ہے گوارا مجھ کو

جستجو ساتھ ہے شمع رہ منزل بن کر

اپنی بے راہروی بھی ہے گوارا مجھ کو

لذت‌ زیست بہ ہر طور سبھی کو ہے عزیز

زہر مینائے خودی بھی ہے گوارا مجھ کو

سوزن رحم و کرم کرتی ہے کیوں سعئ رفو

چاک دامان تہی بھی ہے گوارا مجھ کو

آپ للہ نہ فرمائیں زیادہ زحمت

اب توجہ کی کمی بھی ہے گوارا مجھ کو

صرف تر دامنئ دل ہی پہ اصرار نہیں

چشم پر نم کی کمی بھی ہے گوارا مجھ کو

جرأت عرض تمنا سے ہوں بد ظن یعقوبؔ

ضبط کی کم سخنی بھی ہے گوارا مجھ کو

shauq ki kam nigahi bhi hai gawara mujh ko

gham to gham aj khushi bhi hai gawara mujh ko

justuju sath hai sham-e-rah-e-manzil ban kar

apni be rahrawi bhi hai gawara mujh ko

lazzat-e-zist ba har taur sabhi ko hai aziz

zahr-e-mina-e-khudi bhi hai gawara mujh ko

sozan-e-rahm-o-karam karti hai kyun sai-e-rafu

chak daman-e-tahi bhi hai gawara mujh ko

ap lillah na farmaen ziyada zahmat

ab tawajjoh ki kami bhi hai gawara mujh ko

sirf-e-tar damani-e-dil hi pe israr nahin

chashm pur nam ki kami bhi hai gawara mujh ko

jurat-e-arz-e-tamanna se hun bad zan yaaqub

zabt ki kam sukhani bhi hai gawara mujh ko