طوفاں کی زد پہ اپنا سفینہ جب آ گیا

طوفاں کی زد پہ اپنا سفینہ جب آ گیا

ساحل کو موج موج کو ساحل بنا گیا

منہ تکتے تکتے تھک گئیں حرماں نصیبیاں

ہر انقلاب شوق کی ہمت بڑھا گیا

ذوق نظر کی جرأت بے باک الاماں

رنگ حیات بن کے فضاؤں پہ چھا گیا

تھرا کے شمع انجمن عیش بجھ گئی

نیرنگ‌ نور صبح و منظر دکھا گیا

عجز رہ نیاز کے قربان جائیے

نقش قدم کو نقش تمنا بنا گیا

اتنا کرم بھی جبر محبت کا کم نہیں

گھٹ گھٹ کے مرنے والوں کو جینا سکھا گیا

شعلے سے کیوں لپکتے ہیں گلشن سے بار بار

یعقوبؔ کیا بہار کا موسم پھر آ گیا

tufan ki zad pe apna safina jab a gaya

sahil ko mauj mauj ko sahil bana gaya

munh takte takte thak gain hirman nasibiyan

har inqilab shauq ki himmat barha gaya

zauq-e-nazar ki jurat be bak alaman

rang-e-hayat ban ke fazaon pe chha gaya

tharra ke sham-e-anjuman-e-aish bujh gai

nairang-e-nur-e-subh-o-manzar dikha gaya

ijz-e-rah-e-niyaz ke qurban jaiye

naqsh-e-qadam ko naqsh-e-tamanna bana gaya

itna karam bhi jabr mohabbat ka kam nahin

ghut ghut ke marne walon ko jina sikha gaya

shole se kyun lapakte hain gulshan se bar bar

yaaqub kya bahar ka mausam phir a gaya