مذاق کاوش پنہاں اب اتنا عام کیا ہوگا

مذاق کاوش پنہاں اب اتنا عام کیا ہوگا

زباں پر ہم صفیروں کی مرا پیغام کیا ہوگا

کہے دیتا ہے خود آغاز ہی انجام کیا ہوگا

تری آتش بیانی سے چراغ شام کیا ہوگا

نہ گھبرا باغباں بلبل کی رسمی نوحہ خوانی سے

بھلا ان چند تنکوں کا نشیمن نام کیا ہوگا

فدائے کسمپرسی ہوں نثار تلخ کامی ہوں

مرے عزم طلب کا مدعا آرام کیا ہوگا

فریب اندر فریب آتش در آتش اے معاذ اللہ

خدا ناکردہ فصل گل ترا انجام کیا ہوگا

ارادت کا بھرم کھل جائے گا بیعت نہ لے ساقی

گرفتار سلاسل ہوں طواف جام کیا ہوگا

یہ کیوں سمجھاؤں میں یعقوبؔ نوک نشتر غم کو

جو باقی رہ گیا ہے خون ہفت اندام کیا ہوگا

mazaq-e-kawish-e-pinhan ab itna am kya hoga

zaban par ham safiron ki mira paigham kya hoga

kahe deta hai khud aghaz hi anjam kya hoga

tiri atish bayani se charagh-e-sham kya hoga

na ghabra baghban bulbul ki rasmi nauha khwani se

bhala un chand tinkon ka nasheman nam kya hoga

fida-e-kasmapursi hun nisar-e-talkh kami hun

mire azm-e-talab ka muddaa aram kya hoga

fareb andar fareb-e-atish dar atish ai maaz allah

khuda nakarda fasl-e-gul tira anjam kya hoga

iradat ka bharam khul jaega baiat na le saqi

giraftar-e-salasil hun tawaf-e-jam kya hoga

ye kyun samjhaun mein yaaqub nok-e-nashtar-e-gham ko

jo baqi rah gaya hai khun-e-haft andam kya hoga