تضاد اچھا نہیں طرز بیاں کا ہم زبانوں میں

تضاد اچھا نہیں طرز بیاں کا ہم زبانوں میں

حقیقت کو چھپاتا جا رہا ہوں داستانوں میں

سبھی تو آج برگشتہ ہیں عظمت سوز پستی سے

مچا رکھی ہے اک ہلچل زمیں نے آسمانوں میں

سمجھتا ہوں میں بے مفہوم سی آواز شکوے کو

مصیبت خود مدد کرتی ہے آ کر امتحانوں میں

مرا آئینۂ احساس حیراں ہو نہیں سکتا

یقیں کا نور پیدا کر ہی لیتا ہے گمانوں میں

بنا رکھا ہے بد تر از قفس خوف اسیری نے

سوا تنکوں کے اب کیا رہ گیا ہے آشیانوں میں

نیا اک معبد امید بھی تعمیر کرنا ہے

عنادل معتکف کب تک رہیں گی گلستانوں میں

مری نیرنگیاں چھانے لگی ہیں رنگ محفل پر

بہت کچھ فرق یعقوبؔ آ چلا ہے داستانوں میں

tazad achchha nahin tarz-e-bayan ka ham zabanon mein

haqiqat ko chhupata ja raha hun dastanon mein

sabhi to aj bargashta hain azmat soz-e-pasti se

macha rakhi hai ik halchal zamin ne asmanon mein

samajhta hun main be mafhum si awaz shikwe ko

musibat khud madad karti hai a kar imtihanon mein

mira aina-e-ehsas-e-hairan ho nahin sakta

yaqin ka nur paida kar hi leta hai gumanon mein

bana rakha hai bad tar az qafas khauf-e-asiri ne

siwa tinkon ke ab kya rah gaya hai ashiyanon mein

naya ik maabad-e-ummid bhi taamir karna hai

anadil motakaf kab tak rahengi gulistanon mein

miri nairangiyan chhane lagi hain rang-e-mahfil par

bahut kuchh farq yaaqub a chala hai dastanon mein