صبر خود اکتا گیا اچھا ہوا

صبر خود اکتا گیا اچھا ہوا

کچھ تو بوجھ احساس کا ہلکا ہوا

وہ غرور ہوشمندی کیا ہوا

جو قدم پڑتا ہے وہ بہکا ہوا

چھیڑ بیٹھا وقت اپنی راگنی

ساز پر جب آپ کا قبضہ ہوا

تک رہا ہے خود انہی کی انجمن

فتنہ فتنہ ان کا چونکایا ہوا

روپ بدلا ہے سحر کا رات نے

دیکھنے والو تمہیں دھوکا ہوا

کر رہے ہو کس سے تم ذکر چمن

غنچہ غنچہ ہے مرا دیکھا ہوا

آپ کج رو ہیں کہ سب کج فہم ہیں

حل بڑی مشکل سے یہ عقدہ ہوا

مصلحت یعقوبؔ کیوں ہے دم بخود

راز کس کی بزم کا افشا ہوا

sabr khud ukta gaya achchha hua

kuchh to bojh ehsas ka halka hua

wo ghurur-e-hoshmandi kya hua

jo qadam parta hai wo bahka hua

chher baitha waqt apni ragni

saz par jab ap ka qabza hua

tak raha hai khud unhi ki anjuman

fitna fitna un ka chaunkaya hua

rup badla hai sahar ka rat ne

dekhne walo tumhen dhoka hua

kar rahe ho kis se tum zikr-e-chaman

ghuncha ghuncha hai mira dekha hua

ap kaj ro hain ke sab kaj fahm hain

hal bari mushkil se ye uqda hua

maslahat yaaqub kyun hai dam bakhud

raz kis ki bazm ka ifsha hua