چاہتی ہے آخر کیا آگہی خدا معلوم

چاہتی ہے آخر کیا آگہی خدا معلوم

کتنے رنگ بدلے گی زندگی خدا معلوم

کل تو خیر اے رہبر تیرے ساتھ رہرو تھے

آج کس پہ ہنستی ہے گمرہی خدا معلوم

اب بھی صبح ہوتی ہے اب بھی دن نکلتا ہے

جا چھپی کہاں لیکن روشنی خدا معلوم

راستی گریزاں ہے آشتی ہراساں ہے

کس سے کس سے الجھے گا آدمی خدا معلوم

اب تو وقت آیا ہے ڈوب کر ابھرنے کا

کتنی کشتیاں ڈوبیں اور ابھی خدا معلوم

ذوق نغمۂ پیرائی تو ہی بڑھ کے دے آواز

کب سے غرق حیرت ہے خامشی خدا معلوم

صرف بھیک مانگی تھی ہم نے آدمیت کی

کیوں بپھر گئے یعقوبؔ مدعی خدا معلوم

chahti hai akhir kya agahi khuda maalum

kitne rang badlegi zindagi khuda maalum

kal to khair ai rahbar tere sath rahrau the

aj kis pe hansti hai gumrahi-e-khuda maalum

ab bhi subh hoti hai ab bhi din nikalta hai

ja chhupi kahan lekin raushni khuda maalum

rasti gurezan hai ashti hirasan hai

kis se kis se uljhega admi khuda maalum

ab to waqt aya hai dub kar ubharne ka

kitni kashtiyan duben aur abhi khuda maalum

zauq-e-naghma-e-pairai tu hi barh ke de awaz

kab se gharq-e-hairat hai khamushi khuda maalum

sirf bhik mangi thi ham ne admiyyat ki

kyun biphar gae yaaqub muddai khuda maalum